前港姐李美慧早前自爆已入紙結婚，6月將「閃嫁」拍咗拖半年幾、大佢25年嘅富商曾文豪。曾文豪二女曾昭亮(Alison)昨日(17日)出席公開場合，亦有回應Daddy即將再婚一事。
當Alison談及「準繼母」李美慧嘅時候，就話︰「好開心 for Daddy、媽咪，呀，唔係媽咪，係好開心for Daddy。」記者追問係咪叫李美慧做Auntie？曾昭亮就話︰「都唔係 Auntie，佢同我一樣大。」而事實上，一樣都係31歲嘅李美慧，年紀仲細過Alison少少！
爸爸要再婚 事前冇問佢意見
對於Daddy同李美慧「閃婚」，Alison直言有少少突然。當問及爸爸有冇就結婚一事問佢意見？Alison笑笑口、好肯定咁話︰「冇！」但Alison都為爸爸感到開心，「好開心！Everyone deserves Love! (每個人都值得擁有愛！)」
31歲嘅Alison，早喺2015年已經結婚，同外藉老公育有一對子女。咁佢又贊唔贊成曾文豪同李美慧生B呢？Alison話：「會！因為自己有自己嘅family，冇所謂啦，總之自己開心就得喇！希望爸爸開心啦，都冇所謂，佢都好young啫！」
這篇文章 【都係31歲】李美慧仲細過曾文豪二女 曾昭亮︰唔嗌媽咪 最早出現於 流動新聞。
